Fashion Group Albania dhuron mbi 5,000 veshje për familjet në nevojë të Tiranës

Fashion Group Albania dhuron mbi 5,000 veshje për familjet në nevojë të Tiranës.

Në bashkëpunim me Bashkinë e Tiranës, Fashion Group Albania i ka dhuruar veshje familjeve dhe personave në vështirësi ekonomike. Gjatë një “maratone” tre ditore, punonjësit e Fashion Group Albania dhe qendrave komunitare të bashkisë kanë shpërndarë mbi 5.000 veshje.

Pasi janë njohur me vështirësitë dhe mungesat e shumë familjeve në Tiranë, Fashion Group Albania vendosi që një pjesë të koleksionit të markave Mango, Cortefiel, Okaidi, Springfield, Geox, Carpisa, Parfois, Prenatal dhe Women’Secret t’ia dorëzojë Bashkisë së Tiranës për ta shpërndarë te këto familje. Veshjet me një vlerë prej 25.000 Eurosh u shpërndanë në tre zona të ndryshme të Tiranës.

Në përgatitjen dhe shpërndarjen e veshjeve u përfshi edhe vetë stafi i Fashion Group Albania. Punonjësit e shoqërisë u angazhuan në pergatitjet e pakove të veshjeve dhe ndoqën nga afër një pjesë të mirë të shpërndarjes te familjet në nevojë.

Kjo nuk është hera e parë që Fashion Group Albania dhuron veshje për individët apo për familjet në nevojë, në kuadër të kontributit social. Vëmendja e FGA karshi grupeve sociale në nevojë do të vijojë edhe në të ardhmen duke ndjekur edhe strategjinë e përgjithshme të Grupit BALFIN.

Përgjatë vitit 2020 Fashion Group Albania organizoi dy fushata të mëdha dhurimi në bashkëpunim me Bashkinë Tiranë dhe organizatën Fundjavë Ndryshe, dhe një tjetër organizatë në Bulqizë.

 Solidariteti i partnerëve me kontribut në shoqërinë shqiptare ndaj familjeve në nevojë është tashmë prioritet për Bashkinë Tiranë. Shërbimi Social i Bashkisë Tiranë kujdeset në forma të ndryshme që çdo ditë të jetë sa më afër familjeve në nevojë dhe të lehtësojë integrimin e tyre në komunitetin ku jetojnë. Pjesë e kauzës tonë “Në  ndihmë  të  familjeve  në  nevojë” ka qenë edhe Fashion Group Albania. Së bashku, bëmë të buzeqeshin rreth 500 familje të Bashkisë Tiranë,”  shprehet Anisa Subashi , Drejtore e Shërbimit Social, pranë Bashkisë Tiranë.

FGA ka një kontribut disaplanësh në përmirësimin e jetës së përditshme të komuniteteve. Përveç përzgjedhjes së veshjeve me materiale ekologjike dhe ofrimit të punësimit për shumë të rinj, ne kemi treguar që jemi përherë të vëmendshëm karshi nevojave që kanë grupe të caktuara sociale,”  tregon Ornela Kastrioti, Drejtuese e Departamentit të Komunikimit të FGA.

Nismat tona sociale do të vijojnë edhe në muajt e tjerë përgjatë 2021, duke patur në fokus riciklimin e veshjeve si edhe mbështetjen e fëmijëve dhe shtresave më në nevojë,”  thotë Briseida Gogaj, Drejtuese e Departamentit Komercial të FGA gjatë shpërndarjes së veshjeve.