Një Çantë, Një Dashuri
Nëse ka një traditë që Fashion Group Albania e ruan me krenari vit pas viti, është ajo e dhënies së një jete të dytë rrobave të fëmijëve, duke dhuruar ngrohtësi, dashuri dhe shpresë për ata që kanë më shumë nevojë. Dhe nëse na keni ndjekur prej kohësh, e dini mirë që po flasim për LoveBag.
Gjatë gjithë muajit Qershor, fushata e dashur LoveBag u rikthye në dyqanet Okaidi Albania në Tiranë dhe QTU, duke ftuar klientët të dhuronin veshje nga garderoba e tyre. Tradita e kësaj fushate nis gjithmonë më date 1 Qershor – Ditën Ndërkombëtare të Fëmijëve. Një datë simbolike që na kujton çdo vit dashurinë dhe çiltërsinë e fëmijëve, të cilët përmes dhurimit të veshjeve të tyre, sjellin buzëqeshje tek ata fëmijë që përballen me vështirësi dhe që nuk kanë mundësinë të ndjehen njësoj si bashkëmoshatarët e tyre.
Në bashkëpunim me Forumin e Gruas Elbasan dhe Fashion Group Albania u siguruan që fëmijët të përfitonin veshje të domosdoshme dhe një kujdes të ndjeshëm. Fushata u zhvillua përgjatë gjithë muajit Qershor dhe ishte e hapur për të gjithë ata që dëshironin të kontribuonin, veçanërisht kolegët e Grupi BALFIN, të cilët iu bashkuan kësaj tradite domethënëse.
Një pamje nga fushata e vitit të kaluar
Nuk është çudi që fushata LoveBag vazhdon të pritet me entuziazëm nga qindra familje. Pas suksesit mbresëlënës të nismës së vitit të kaluar dhe falë bujarisë së klientëve të Okaidi Albania, u mblodhën rreth 1500 LoveBag, duke siguruar që fëmijët jo vetëm të pajiseshin me veshjet e nevojshme, por edhe të ndjenin dashurinë e atyre që dhuruan.
Më shumë se një fushatë
Kjo traditë e dashur shkon përtej një iniciative të zakonshme të përgjegjësisë sociale; ajo mishëron fuqinë e vërtetë të komunitetit dhe tregon se sa ndikim të madh mund të ketë veprimi i përbashkët. Fashion Group Albania siguron që çdo donacion të shpërndahet në mënyrë të kujdesshme dhe të efektshme te fëmijët që e kanë më shumë nevojë.
Për t’u bërë pjesë e kësaj tradite dashamirëse, që tashmë ka zënë vend në zemrat e shumë familjeve dhe fëmijëve, ju ftojmë të vizitoni dyqanet Okaidi Albania në Tiranë për më shumë informacion mbi fushatën LoveBag dhe mënyrat se si mund të kontribuoni në të ardhmen, si dhe të ndiqni Fashion Group Albania dhe Okaidi Albania në rrjetet sociale për njoftime apo dhe detaje të mëtejshme.
Ndajeni lajmin me miqtë, familjarët apo njerëzit tuaj të zemrës, sepse çdo kontribut ndihmon më shumë fëmijë në nevojë.